انتصار المحور المزعوم على حساب الشعب المطحون

 

* الدولار كان بـ 1500 فطار وارتفع، وهبط سعر الليرة، ومستمر بالهبوط!!! بس انتبه.. المحور انتصر!!! * اليهود خلصوا تطعيم وتلقيح شعبهم، ونحن ما بلشنا، بس المحور انتصر!!! * طار مرفأ بيروت وتحطم، لكن مرفأ حيفا ومرافئ الجوار شغّالة، بس المحور انتصر!!! * الحد الأدنى للأجور صار أقل من 50 دولار، بس ما بيهم، المهم المحور انتصر!!! * معاش العسكري يلي حاطت دمو عكفه، صار أقل من 100 دولار وأقل إن استمر هيك الوضع، كمان مش مهم، لأن المحور انتصر!!! * معظم الأطباء والممرضين والمهندسين والمعلمين هاجروا، أو لح يهاجروا من لبنان،بس ما بيأثر لأن المحور انتصر!!! * مؤسسات وشركات كبرى أقفلت، وكبار التجار انخرب بيتها، بس المحور انتصر!!! * المصارف ومن وراهم، سرقوا مال الشعب، وسرقوا جنى عمر المواطن على عينك يا تاجر، بس قد يقول قائل: فداهم لأن المحور انتصر!!! * طلاب الجامعات وأهلهم في لبنان والخارج وصلوا لحد اليأس، بس المهم المحور انتصر!!! * ما حدن من دول العالم بيتعاطى معنا، وما في رئيس دولة بيجي بيشرب بلبنان فنجان قهوة، بس مش قصة.. لأن المحور انتصر!!! * الكهربا بتجي ساعتين بالنهار، بس هينة لأن المحور انتصر!!! * الزبالة والتلوث واللحم الفاسد والدجاج المضروب حرقت أعصاب الشعب، ولوْ... ما المحور انتصر!!! * فقدان الأدوية وتزويرها والتلاعب بصحة المواطن، "عادي" مش المحور انتصر!!! * التشليح والنهب والخطف عينك بنت عينك، بس المحور انتصر!!! * الناس عم يتقاتلوا على غالون زيت مدعوم وكيس حليب وكيس سكر، بس قد يقول قائل: فداكم فالمهم المحور انتصر!!! طيّب إذا كل هالفواجع وغيرها كتير عم تصير بلبنان، يلي كان بيوم من الأيام (سويسرا الشرق!!) حدن يشرحلي كيف بتكون الهزيمة؟؟؟ وبيجيك الجواب الجاهز عند لصوص وسفهاء البلد، وبلسان كاذب «مش مهم الهزيمة، المهم المحور انتصر!!!» أليس هذا من واقع لبنان الأليم الذي نعيشه؟؟ توووووووووووت!!! ألا لعنة الله وتفووووو على من كان السبب كائنا من كان.... على فكرة.. أنا ما بعرف مين هو، ولا شو بيعني المحور!!!!

لكم مني أرقُّ التَّحيات وأعطرها

وإلى أن نلتقي على الخير دائمًا

أترككم بحمى الرحمن

وكتب #محمد_الجنَّان

أبو هيثم